2021 წლის 05 იანვრიდან საგადასახადო კოდექსში მნიშვნელოვანი ცვლილებები შევიდა. ცვლილებები განპირობებულია პანდემიის საფუძველზე მსოფლიოში შექმნილი სიტუაციით და იმ სოციალური პროექტებით, რასაც საქართველოს მთავრობა ახორციელებს შექმნილი ეკონომიკური კრიზისის დასაძლევად.

ცვლილებების თანახმად, შექმნილი სიტუაციიდან გამომდინარე, დავის განმხილველ ორგანოებს უფლება მიენიჭათ საგადასახადო საჩივრები განიხილონ დისტანციურად, ტექნიკურ საშუალებათა გამოყენებით, რაც ხელს შეუწყობს დისტანციის დაცვას და კონტაქტების მინიმიზაციას.

გარდა ზემოაღნიშნულისა, მნიშვნელოვანი ცვლილებები განხორციელდა საგადასახადო შეღავათების კუთხით. საგადასახადო შეღავათები შეეხო როგორც საშემოსავლო გადასახადს, ასევე დღგ-ს, ქონებისა და იმპორტის გადასახადებს.

გახანგრძლივდა დაქირავებულისთვის გაცემული 750 ლარამდე ხელფასიდან დაკავებული და გადასახდელი საშემოსავლო გადასახადისაგან გათავისუფლების ვადა დამატებით 6 თვის ვადით, კერძოდ, 2020 წლის 01 დეკემბრიდან 6 თვის განმავლობაში - 2021 წლის 31 მაისის ჩათვლით პერიოდში დამქირავებელი უფლებამოსილია შეიმციროს (ბიუჯეტში არ შეიტანოს) დაქირავებულისთვის გაცემული 750 ლარამდე ხელფასიდან დაკავებული და გადასახდელი საშემოსავლო გადასახადი, თუ ამ დაქირავებულის მიერ ამავე დამქირავებლისგან 1 კალენდარული თვის განმავლობაში მიღებული ხელფასი 1500 ლარს არ აღემატება. ამასთან, აღნიშნული საგადასახადო შეღავათი არ ვრცელდება:

•             საბიუჯეტო ორგანიზაციაზე;

•             საქართველოს ეროვნულ ბანკზე;

•             ეროვნულ მარეგულირებელ ორგანოზე;

•             საწარმოზე, რომლის აქციების/წილის 50%-ზე მეტს ფლობს სახელმწიფო ან მუნიციპალიტეტი, აგრეთვე ამ ტიპის საწარმოს მიერ დაფუძნებულ/შვილობილ საწარმოზე, თუ ეს საწარმო მის მიერ დაფუძნებული/შვილობილი საწარმოს აქციების/წილის 50%-ზე მეტს ფლობს.

საგადასახადო შეღავათი დაწესდა იმ პირებისათვის, რომლებიც საქმიანობას ახორციელებენ სასტუმროების /დროებითი განთავსების ობიექტების ფუნქციონირების სფეროში. შეღავათი გულისხმობს იმას, რომ საქართველოს ფინანსთა მინისტრს/შემოსავლების სამსახურის უფროსს უფლება აქვს, 2020 წლის ნოემბერსა და დეკემბერში გადასახდელი საშემოსავლო გადასახადის გადახდის ვადა გაუგრძელოს არაუგვიანეს 2021 წლის 1 ივლისისა, თუ სასტუმრო/დროებითი განთავსების საშუალება მდებარეობს ერთ-ერთ შემდეგ ლოკაციაზე:

•             ბორჯომის მუნიციპალიტეტის დაბა ბაკურიანი;

•             ყაზბეგის მუნიციპალიტეტის სოფელი გუდაური;

•             ხულოს მუნიციპალიტეტში მდებარე კურორტი გოდერძი;

•             მესტიის მუნიციპალიტეტის დაბა მესტია.

ამასთან, აღნიშნულ შემთხვევაში გადასახადის გადამხდელს გადასახადის გადაუხდელობისათვის საურავი არ დაერიცხება.

ცვლილება შეეხო დამატებული ღირებულების გადასახადსაც, კერძოდ, გადასახადის გადამხდელი უფლებამოსილია 2020 წლის 1 დეკემბრიდან 6 კალენდარული თვის (საანგარიშო პერიოდის) განმავლობაში გაწეული იჯარის/ლიზინგის მომსახურება დღგ-ით დაბეგროს ამ მომსახურების საკომპენსაციო თანხის/თანხის ნაწილის ფაქტობრივად გადახდის საანგარიშო პერიოდში.

კიდევ ერთი საგადასახადო შეღავათი გახლავთ ის, რომ ქონების გადასახადისგან, რომლის დეკლარირება 2021 წელსაა გათვალისწინებული, გათავისუფლებულია შემდეგ საქმიანობაში გამოყენებული ქონება:

•             სასტუმროები და განთავსების მსგავსი საშუალებები;

•             დასასვენებელი და სხვა მოკლევადიანი განთავსების საშუალებები;

•             რესტორნები და საკვებით მობილური მომსახურების საქმიანობები;

•             სასმელებით მომსახურების საქმიანობები;

•             ტურისტული სააგენტოები, ტურ-ოპერატორები და სხვა დაჯავშნის მომსახურება და მათთან დაკავშირებული საქმიანობები.

აღნიშნული საგადასახადო შეღავათი ვრცელდება აგრეთვე იჯარით, ლიზინგით ან სხვა ამგვარი ფორმით გადაცემულ ქონებაზედაც, თუ ეს ქონება ამავე ნაწილით განსაზღვრულ რომელიმე საქმიანობაში გამოიყენება.

ამასთან, პირი, რომელიც ახორციელებს რომელიმე ზემოაღნიშნულ საქმიანობას, აგრეთვე უფლებამოსილია შეიმციროს (ბიუჯეტში არ შეიტანოს) უკვე გადავადებული საშემოსავლო გადასახადი (საშემოსავლო გადასახადი, რომლის გადახდისთვის საგადასახადო კოდექსით განსაზღვრული ვადა გაგრძელებულია).